故事見證

兩年前因工傷，斷了脊骨同髖骨，全身上下，稍一鬱動便痛不欲生，每日只有營養奶粉及大量止痛藥同治療藥物陪伴在旁。也不能同父母及家人訴說，怕父母擔心。

斷了的脊骨壓住神經及骨頭外翻，至少有九至十個月不能躺睡，只能坐響度瞓。即使今日雖能躺著瞓，但也不能完全躺平。那時候連落床都要半個鐘，出事前幾秒就能做到的事都彷彿變成此生遙不可及的事。😭😭

那時候“我所看見的未來” 就是一個殘廢人，每日與身體的痛楚単打獨鬥，無人能傾訴，擔心將來，連兩蚊車我都未夠秤申請，唔通真係要瞓係街度乞？不知所措，意志每日都被侵蝕腐爛。說好的神愛世人去咗邊？？

當時並沒有宗教信仰，有時痛得厲害時會對著空氣破口大罵😡😡，不論正/負能量都被罵過淋漓，宣洩過後冷靜下來，又繼續痛。雖然蠢但得到片刻安寧。

病咗差不多一年後，唔知點解，我嘅case 由瑪嘉烈轉咗嚟北大嶼山醫院，北大醫生轉介我去老人日間中心做全日制復康治療。午飯後有個小休時間，我通常都用嚟午睡，畢竟都被訓練咗成年坐響度瞓（哈哈！）

但有時候醫院院牧部同工同義工會嚟傳道，起初覺得又嚟講耶穌，阻住瞓覺。

但有一部分讓我非常驚訝，北大的院牧同工/義工並不冷冰冰哋齋講神跡，佢哋會行埋你身邊同你傾偈，佢哋會記得你個名，記得你同佢講過嘅事。甚至提供一啲你生活上需要嘅資料。

雖無實體的禮物，但佢哋會借出耳朶去聽我哋嘅負面嘢，讓你舒洩心中的負能量，那怕只借出五分鐘，病人當晚也能睡得香地好好休息。😴😴

佢哋會記得你個名，讓你覺得被尊重，存在感對病人嚟講都好重要。🫥🫥

佢哋會記得你講過嘅困難，讓你覺得被人關心。🤗🤗

同工及無酬的義工送給病人的都是免費的。時間一點一點累積下來，佢哋無私嘅付出讓我知道，我需要的並非起死回生式的轟烈神蹟，而是平安喜樂地活下去。

沿途有佢哋作伴，能走多遠就多遠。不計較❤️

雖然到今天我仍祈求神給我那六個幸運數字，讓我人生中有點轟烈的煙花。

🤣🤣🤣🤣🤣🤣